تناول الكاتب الصحافي إبراهيم عيسى، اليوم الثلاثاء، ما تداولته وسائل إعلامية من أنباء حول اتصالاتٍ أجرتها مؤسسة الرئاسة، لعقد لقاء بين الرئيس عبد الفتاح السيسي وممثلي الائتلافات الشبابية التي تشكلت عقب ثورة 25 يناير، للحديث عن مختلف القضايا التي تشغلهم، أو ما أُطلق عليه إعلاميًا "احتواء الرئيس للشباب"؛ قائلًا: "المصطلح فج للغاية، يعني هتضحك عليهم يعني، نلمهم مثلًا".

وأضاف عيسى، خلال برنامجه "مع إبراهيم عيسى"، عبر فضائية "القاهرة والناس"، "الكلمة فيها استخفاف بأن الشباب يمكن احتواؤه، مش التفاعل معاه مثلًا، لا، مش الاستماع والإنصات والتعلم من مشاكله وخبراته وأفكاره، لا، وتلاقي السيسي بيقول (احتواء الشباب)، اللي هو نضحك عليهم يعني، سيبنا من مين هم الشباب أصلًا اللي إنت عايز تحتويهم، لكن إحنا بنتكلم عن المصطلح نفسه، اللي هو في ذاته تعبير عن سلطة أبوية والدية، مفيش فايدة، وكأننا نستعير فكرة (رب العائلة) من جديد، مش معقول كده".

وتابع: "هي الناس دي مش كانت عايشة معانا قبل كده ولا إيه، مش كل اللي عايشين دلوقتي معانا عاشوا الزمن اللي فات، اللي هو قبل 25 يناير، إنتوا بتكرروا كل شيء كان قبل كده، فاكرين مثلًا إنه هيدي نتائج جديدة، إنتوا كنتوا عايشين معانا يعني ولا أنا اللي مكنتش عايش معاكم، أنا توهت مني على فكرة".