انتقد الإعلامي عمرو أديب، أمس الأحد، إلغاء الندوة الشهرية للدكتور الروائي علاء الأسواني، التي كان مقرر عقدها في محافظة الإسكندرية، لاعتراض الجهات الأمنية على موضوعها، والتي كانت تحمل عنوان "نظرية المؤامرة بين الواقع والأوهام"؛ قائلًا: "إيه هي خطورة الأسواني، الحصار والتضييق ليه، لو الدولة دي خطر عليها الأسواني أو غيره تبقى الدولة هشة".
 
وأضاف أديب، خلال برنامج "القاهرة اليوم"، عبر قناة "اليوم"، "الأسواني لا صاحبي ولا حبيبي ولا نعرف بعض، لكن الراجل ده واقف معانا في نفس الموقع، يمكن يكون ليه رأي مخالف، يكم يكون شايف إن حرية الرأي وحقوق الإنسان في الدولة ليست على ما يرام، ما يشوف اللي هو عايزه، إيه المشكلة يعني، لكن يكون ثمن ذلك التضييق الأمني عليه، خلي كل الناس تقول رأيها".
 
وتابع: "علاء الأسواني قيمة، نختلف أو نتفق معه، لكن لا يصح منعه، العصر ده انتهى، محدش يقدر يمنع حد من الكلام، لازم كل الناس تتكلم وتقول اللي عايزاه، المدرسة القديمة دي مش هتعرف تكمل وهندفع ثمنها غالي، دي مش صورة مصر، نتحفظ أه لكن نمنع لا، وأنا بدعو الأسواني إنه يجي البرنامج يقول اللي هو عايزه، مينفعش التضييق عليه".